Vapual (Hornbill)

- Joseph Saia

Vapual hi sava chi Bucerotidae an tih zinga tel a ni a, hemi zingah hian sava chi tam tak an awm a, an chenna hmun leh ram a zirin an ziarangte pawh a inang lo thluah a ni. Vapual hi chhui mite sawi dan chuan chi 57 lai awm niiin an sawi a, South Africa Sahara thlaler, Asia ram lum hmun thenkhatah leh Philippine, Solomon Island-ah te hmun tur a tam ber a ni.

Vapual chi leh kuang a inan loh ang bawkin an taksa pian hmang leh an rih lamte pawh a inang lo thluah a, Black Dwarf Hornbill (Tockus hartlaubi) an tih hi 102 grams (3.6 oz) vela rit a ni a, 30 cm (1 foot) vela sei a ni bawk. Southern Ground-hornbill (Bucorvus leadbeateri) an tih chu 6.2 kg (13.6 lbs) vela rit a ni thung a, 1.2 m (4 feet) vela sei a ni bawk. A tlangpuiin a rawng a dum a, a var, a buang, a dur leh a sen rawng neite pawh an awm tho a ni.

A tlangpuiin Vapual nu aiin vapual pa hi a lian bik a, inpawl dan (sexual dimorphism) pawh a inang lo thluah bawk. Vapual danglamna ber chu hmui lian tak a neih leh nghawng chhah tak a neih hi a ni. A hmui hi a hmang tangkai em em a, insual nan te, a bu sakna atan leh a ei tur ransa dang man nan a hmang tangkai hle a ni. Vapual hian hmuntheihna mit tha tawk a nei bawk a, a thlir phak chin chin chu fiah takin a hmuthei a, a mitko chhah takin a mit a ven tlat avangin Ni pawhin a mit hi a kahkhalh thei lo

Vapual khawsak dan hi a ngaihnawn hle a, a tlangpuiin a nu emaw a pa emaw pawh ni se anmahniin an tla hrang ngai lova. A kawpin emaw a khawmin emaw an awmtlang deuh ber a, an kalna apiangah an inzui zel a ni. Vapual hian a tlangpuiin an chaw atan theipui rah emaw a hnah emaw an ring ber a. Theirah chi hrang hrangte pawh an ei a, rannung (insect)-te pawh an ei bawk a, ransa lian em em lo te pawh an ei chang a awm bawk. Thil eng emaw an ei in an dawlh nghal mai thei lova, an lei a tawi em avangin an hmuiin vawi tam tak an thingkual hmasa thin a, chumi hnuah an ei thin. Vapualte pawh hian mahni hmun leh ram an humhalh tha em em a, he an hmun leh ram humhalhah hian chaw an zawng a, an hmun leh ram hmuhalh pawh hi a zau thei hle a ni.

Vapual pa hian chaw a zawng deuh ber a, a chaw zawnte chu ei nghal mai lovin a nu tan a rawn pu nal nal a, tichuan a nu chu a chawm a, rinawm takin chaw a zawnsak thin. Vapual reng reng chu a tlangpuiin nupain an awm thin a, a nu a tui hun chuan tui var nalh tak paruk a tui thin a. An bu hi lungkham karah leh thing kawrawngahte an siam thin. A nu in a tui tha taka a enkawltheih nan hmun ralmuang tak an thlang thin a, fa an neih hma hian a pa in bu lian tak a siam hmasa a, a pui eikhawp tur chaw a chhekkhawm hnu chuan hlum nemin a kua tinreng a ping a, a ma luhtheihna tur bak chu a awng a siam ngai lo. He a kaw siam atang hian a nu in no a keu hma chu a pa in chaw a pe a, a puiin fa a neih hunah pawh a fate chawm nan he a kaw siam hi a hmang thin. Hetianga a bu kawm em em a a siam chan leh hlum nema a pinvek chhan chu an thian dang vapual sualten an rawn beihtheih loh nan leh him zawka fa an neihtheih nan tih a ni. A pa in a kua a pin zawh chuan a nu pawh a tui tan a, tui pakhat a tui hian ni 5 vel hun a rei bawk. A puiin fa a neih hnu chuan a pui pawhin a fate tan chaw a zawng ve thin a, a chang chuan a nu pawh hian an bu siamte chu tizauvin a fate a enkawl puitling thin a ni.

Vapual hian chanchin a nei sei em em a, a kip a kawia sawi leh ziah sen a nih loh avangin vapual nun atanga kan zir tur chauh tarlang ta mai ila. Kan pi leh pute hun lai atang khan vapual hian sawi a hlawhin an lo hlut em em a, a chhan chu vapual hi a rinawm em em a, a mawhphurhna a hria a, a tih leh tih loh tur pawh a hre a, a huaisen a, hun inher danglama thil awm dan tur thui taka thlir dan a thiam a, a thiltihah a fimkhur a, a nupui fate tan a nun a cham ngam a, hmun leh ram humhalhna chang a hriat vangte a ni.

Kan pi leh pute kha ram leh hnam hmangaih em em tute an lo ni thin a, ram leh hnam tan chuan mahni nunna cham ngam vek hial an ni. Chutiang bawkin hnam nun humhalhna chungchangah pawh luchhum banchhum ngam an lo ni a, chutianga rinawmna leh huaisenna hmang chuan kan hnam ro lung an lo phun a, an meichher chhit pawh vawiin thleng hian a la chimit lova, ram zau tak a la mek zel a ni.

Vawiina keini thangtharte pawh hian kan pi pute hniakhnung zuia ram leh hnam tana rinawmna leh huaisenna hi chhawnnun zel a, hnam nun vawn him zel hi kan mawhphurhna lian ber a ni dawn lawm ni!Vapual ang hian kan ram leh hnam tan rinawm tlat ila, kan nunphung humhlahna atan kan tih tur leh mawhphurnate hria ila, hun rawn kal zela kan Zonun mawi a lo parvul theih nan kan tawn mek dinhmun leh kan kal leh zel dan turte thlir thiamin kan thiltih kawng engkimah fimkhur bawk ila, mite fak leh entawnthlak hnam kan ni ngei ang tih hi vapual nun atanga kan zirthiam a va tul dawn tak em!!!!!!

Thu: www.tuivar.com

Thlalak: https://en.roelvanmastbergen.nl