VAWI KHAT TAWNG LEH ILA

Theatre 4-ah lehkha kan zir laiin rau pakhat hi a lo kal a,min rawn zel a."Ziak rawh"tiin min tur sek a,tichuan ka'n khualchau chem thiah thla ve rawk ta a.Ruihhlo vanga tawrhna rapthlak tak hmachhawntute huang ka lo dai ve ta reng a - thu leh hla-in!

Exam kan zawh ni a ni a.Hui rei tak chhung chawlh a nih dawn avangin kan University-a zirlai tinte kan hlim a,kan thil phal a,kan phawklek hlawm.Ka thiam ang tawk ka chhan zawh hnu,in lam pana hawn mai ka tum lai chuan thianten,"Hei thianpa,lo leng ve hrih rawh,a tawp ni te a nih hi.Kan inhmu lo vang vang dawn si a,vawiin chu hlim takin,zalen takin mawle..."tiin hawihhawm takin min sawn a.Thianten chutiang ti na na na,thiante ak ruala ak ve lo nih chu(h) tiin ka zui a.An inah leng satliah mai lovin,ka chhunten zu a tem pawha tem chhin hlek lo tura min zirtir thinna chu zawm zo lovin zu ka in ve ta a.Kan rui ber ber a,kan zai a,kan lam a,nuam kan ti ngei e.Kan vai ruai a,hma hunah enge lo thleng thei tih reng kan dawn lova,lungkham kan nei hek lo.Kan thil phel em em a,thuruk zawng zawng pawh thulangah kan chhuah a,kan thawveng veng veng.

Thiante nen tha taka kan ihthlah hnu chuan rui tak chungin,Bike chu kan han start a.Engmah ngaihtuah thui tawh hek lo le-ka chhungten Bike chak taka khalh lo tur leh accident palh a hlauhawmzia min hrilh thinte chu ngaihthahin,zualko tlana a chak thei ang bera tlan vung vung ka han tum a.Chutih lai tak chuan maw...Ui Karei!Oia...nuam hi a lo na lutuk!Nuam hi a lo pawi thui thin lutuk!Thisen a chhuak.Bike a sawm darh vek a,kawng sirah mipui an rak chel chul.

Dawmdawi inah min kalpui nghal a,doctor-ten min virh vut vut."A pawi hle mai chhanthlak a awm tawh lo" ti pahin puanin min khuh nghal."Awi...ka duh thei lo.A ni thei lo.Ka la thi lo.Thi rual pawh ka la ni o,ka la naupang lutuk.Kum 20 chauh ka la ni a,vanglai hun duhawm ka la hmang dawn chauh.Thih ka la hman lo.Zaninah ka Bialnu nen inhmu turin kan intiam lawk vek.Khatin puanin min khuh suh u" tia au vak ka han tum a.Mahse,ka au thei tlat lo.Ka chhungte an lo thleng a,ka Bialnu pawh a rawn tel ve.Ka hmai khuh an han hawng a,an tap chel chul."Ai...Himte,engtizia nge..." tia tap thawm chuan lung a va'n tichhe tak em.Ka hmai khuh leh an tum."Khuh tawh lo ang,ka rawn tho dawn e.Ka la thi awzawng lo" ka tih vak vak pawhin engmah an hre thei si lo."Aw Lalpa,ka thi tak tak maw?A ni lo,ka la thi lo...tiraw?Ka la naupan em hi.Damlai khawvel ka la hmang duh.Khawngaih takin min pe leh rawh" tiin ka tawngtai a,mahse a sawt tawh mawlh lo.Chhai raw...,Nuam hi a lo va na tak em!Nuam hi a lo va pawi thin tak em!Ka kalna tur lah chu hmun rapthlak lutuk tak a ni ringawt.Aw...minung nih hi vawi khat tawng lehin khatiang thlemna kha tawng leh ila aw...Mahse,keh thei dawm taka min lo dawm a,min lo chawi liantu ka nu le ka pa te,ka laihrui zawmpui unau te,ka chungkhat-laina te leh ka sangawi zawnpui zawng zawngte then hlen tur ka ni ta."Pawi" tih awmzia ka hriat hnu chuan khua a tlai zo ta.

Kan inah mupui an lo pung khawm a,ka damlaia ka thian kawmngeih em em - Krossenga t, Vanlalzawna t,Rohmingliana te hi ka ruang chungah an tap vak vak a.Mahse,a rei lo.A der vek an lo ni.Zan a rei deuh a,mi tam tak an mutthluk hnu chuan min phatsan!Nula rimnaah mahni lut hmasa ngam miah si lova,kawngkabiang atang pheikhawk khing lehlam bun lut dawt khawpa thiante nam lut thut thintu Enga hian,"Zu te a in rawk a,chhiat sa nak alaia chhiat belh.Chatuan hremhmun a pan ngei dawn" a'n tih chu(h)!Chu mai a la ni nem,ka Bialnu sawisel sawisel chunga min awt ru em em thintu Zawna leh Hminga te hian ka Bialnu an lo inchuh vel a nih chu(h)!Awi,awi,awi...,a na lutuk,na ka ti lutuk.Vawi khat minung ni lehin nangni nen hian intawng leh ngat ila chu aw...

Ka thih ni chuan mi tam tak an thi ve a.Keimah ang bawka ruihhlo vanga thi tam tak an awm a;an inchhir ve ngawih ngawih hlawm.Inchhirin awmzia a nei tawh lo.Se bo hnua se kawng khar ang a ni ta.Pathian kan au,kan tawngtai.Vawi khat tawng leh ila chu...tiin duhthu kan sam vawng vawng,kan rum tlawk tlawk.Aw...Vawi khat Tawng Leh Ila Aw...