MIZO MIZONA HUMHALH

Who Moved My Cheese (Ka Chhiar Nawn Fo)

02/12/2010 00:08

Ni 25 November 2010, Ningani a ni a, Malaysia khawpui Kuala Lumpur-ah chuan khua a cheng deuh hlek nain, Kuala Lumpur hmun laili – Imbi leh Bukit Bintang veng velah erawh mipui veivak an tlem phahin a lang lo. Chu’ng mipui veivak zingah chuan, Dubai-a a hnathawhna atanga a hawn kawnga Malaysia rawn tlawh zawktu – zaithiam pakhat chibaia kal kei pawh ka tel ve.

Ka haw kawng, Malaysia bungrua leh ilo tinreng zawrhna hmunpui berte zinga pakhat – Times Square building bul hnai ka thlen chuan, ruah a rawn sur tak ta deuh a. Tawm hulna tur zawngin kawng sir dawr  ka melh kual vel a, Times Square lehkhabu dawr liana chawlh paha zirtirna kawnga min tanpuitu lehkhabu en kual zai ka rel a.

Lehkhabu ka en kual vel lai chuan, lehkhabu dawrah hian zinna tur kawng kawhhmuhna lehkhabu tam tak a awm a, lehkhabu chi hrang tam tak a awm bawk bakah, lehkhabu dawr hi nikhua chhiat changin tawm hulna / chawlhna hmun remchang tak a nih avangin khualzin mite tan thian tha ber pakhat a ni ngei ang - tih ka ngaihtuah chhuak a. Kei - zin kawng thui zawh tura kal chhuak, mikhual cham rei , a thlen inpa lawm hlawh vak tawh loh pawhin tunah hian ka kawm ngeih hle a nih hi, tih vel te ka ngaihtuah chhunzawm a. Tichuan, vawi tam tak ka lo chhiar tawh thin lehkhabu tha tak mai pakhat ka hmuh chuan ka rilru a la riau a. A chhung thu hre vek tawh mah ila, chu lehkhabu chu lei lovin ka chhuak thei ta lo a ni.

Lehkhabu dawra dakar 1 vel ka chawlh hnu chuan ruah pawh a lo han der tawh a,  in lam panin ka haw leh ta. Ka lehkhabu lei thar chuan ka rilru a tihlim riau mai a, chhiar hlan ka nghakhlel em em mai bawk a, ka inti thei riau bawk a ni. Chu lehkhabu chu Dr. Spencer Johnson-a ziak “Who Moved My Cheese? An Amazing Way to Deal with Change in Your Work and in Your Life ” hi a ni.

Who Moved My Cheese? By Dr. Spencer Johnson“ hi vawi tam tak ka lo chhiar chhuak tawh thin a, ka nunah danglamna leh beiseina min lo pe thintu a ni. He lehkhabu hi kum 1998-ah chhut khatna tihchhuah a ni. He lehkhabu hi khawvel lehkhabu hralhtla berte zing ami a ni a, New York Times business bestseller nihna kum 5 dawn lai lo hauhtu a ni. He lehkhabu hi copy maktaduai 24 chuang zet hralhchhuah tawh a nih bakah, khawvel tawng chi hrang hranga lehlin a ni.

Who Moved My Cheese? An Amazing Way to Deal with Change in Your Work and in Your Life “ hi zirtir tha tak nei tehkhin thu (parable ) a ni a, a zirtir tum ber chu hringnun kawng chhuk chho zawha kan vah velna kawnga thil danglam/ danglamna lo thleng hmachhawn dan tur leh hman tangkai theih dan tur a ni.

He lehkhabu hi naupan laia skul kalho thin thianza inhmuh khawmna-in a intan a, an nuna danglamna lo thleng leh an nun danglam dan an sawiho atangin “ Who Moved My Cheese? ” thawnthu hi sawichhuah a ni.

A thawnthu-ah chuan bo awlsam tak kawng inkal thelh nuk (maze ) hung chhunga cheng sazu pahnih – Sniff leh Scurry, leh sazu tiat mihring – Hem leh Haw te an tel. He’ng mite hian anmahni chawma chakna pe tur leh tihlim turin Cheese (sap saum kan tih mai thin ) an zawng a, an hmu a, a awmna a lo insawn a, an zawng leh a, an hmu leh a....tih velin a thawnthu a kal.

He thawnthu-a “Cheese ” hian hringnuna kan thil duh – hna tha, then leh rual tha, pawisa, hausakna, rilru hahdamna leh adt.. a entir. “Bo awlsam tak kawng inkal thelh nul (maze ) hmun ” hian kan thil duhte kan zawnna  hmun – kan hna thawhna, chhungkua, kan chenna hmun leh adt... a entir.

He thawnthu-ah hian sazu pahnih – Sniff,  Scurry leh sazu tiat mihring pahnih- Hem, Haw te hian an rin phak loh danglamna an tawk a, an zinga pakhat chuan chu thil rawn danglam chu hlawhtling takin a hmachhawn a, tichuan hlawhtling tura a kal kawnga a thil tawnte chu bangah a ziak ta zel a. Chu banga kutziak chu enin, mahni-ah inbihchian tur tam tak leh insiam that tur tam tak, danglamna/ thil rawn inher danglam hmachhawna hlawhtlin dan tur, hlimna leh beidawn lohna hmuhchhuah dan tur te zir tur a awm a ni.

He lehkhabu hi la chhiar ngai lo kan awm a nih chuan chhiar ngei turin duhsakna ka hlan e.

Heile, "Who Moved My Cheese" by Dr. Spencer Johnson pdf. file download la, chhiar ngei rawh khai....

 

 

Who Moved My Cheese by Dr. Spencer Johnson .pdf (1,8 MB)

Comments

Date 05/05/2011
By puia.tlau1987@gmail.com
Subject tha

chhiar ve chak awm hle mai..a ziak tu ril ru tawm pui a han ciar hi cu nuam ve lwm

 

Contact

Search site

 

 

 

 

                  NGAIHDAN

 

    

     Ngotekherh         Puanchei

   

        Puandum           Hmaram

 

 

 

           THU KAM HNIH KHAT


ShoutMix chat widget

 

 

                TLAWHTUTE


counter globe

 

 

  MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E