World View (Thlirna Tukverh)

- J.Khuma

Thlirna tukverh hi a inan loh chuan chenhonaah inhnialna, inhmuhthiamlohna leh midang thusawi a chhana lak thiam lohna te a thleng thin.  Ei bar zawn a awlna ringawt ngaihtuahtute tan chuan ramdang kal theih chhun veleha cham hlen nghal tum hi thil awm tak a ni a. Ei bar hmuh ngawt ni lo, hnam leh khawtlang tana ngaihtuahna sengte tan erawh chuan chu chu a ni ber leh lo thei bawk. World View-ah a innghat vek.

Company leh NGO-a thawkten engkim hi hlawh hmuhzat chenga a man tehin zawhna an siam thin a ni mai thei. An thiamawm e. Chuti lam kawng chu zawh miau hek le! Chutih laia Pastor-tena hlawh kan buaipui viau erawh hi chu a mission a thelh (miss) deuh thung ang. An luhchhan an puan leh sawi nen a inmil lo tlat alawm.

Bible School zirtirtu chuan Bible school khawvel chhunga mi lo tawh phawt chu kan hmu khawvel pawn mai thei a. Chutiang bawkin Company leh NGO-a thawkten Bible school chu min hmu khawvel pawn hliah hliah ve bawk ang. Campus zim te, biru tak leh pal pawh awm mang hlei lo, hnim buk luih chheh vela khawsa ve nawk nawk kan ni mai a. Thosi lian chi-ah min ngai mai lovang maw, pawh a tih theih. Sumdawng ho lah hian hnadang thawkho hi chu mi benghawng lo ho, mi chut ho te pawh min ti mai thei. A hlawkna tel lawih theih thil awm ve hek lo, hlawm ana. Chutiang bawkin Clinic leh Hospital-a thawkte chuan an khawvel chu an thawhna office vel a nih avangin an tehna engkim deuhthaw hi an thawhna workplace dinhmun nen a inkungkaih lo thei lo. Chu chu an Worl View a ni tlat.

NGO lian tham ve deuh MCC (Myanmar Council of Churches) te-a thawk tawhte chuan MCC lo hmun dang chu hmun pawimawhah an ngai thei mang tawh lo. Chutiang bawkin Kohhran Pakhata awptu ber ni tawh thin ho hian hna dang chu ho an ti a. Tin tla thei tawh lo hiala inngaihna an nei chawk. An hmaa miten kaisan hun leh tlak hun an neih an hmu reng chung pawhin an ni erawh tla thei ve lovah an inngai tlat. World View azir vek a ni.

A letling zawnga mipui hmaa thufote pawh hian mipui kara thut hun kan nei dawn a ni, tih hriat a tha hle. Zirlai tithate chawimawina hlantua min hman vang khan, kan hlanate aiin kan lian vek tihna a ni hran lo tih leh a dawngtute zingah mi ropui tak tak an inphum ru teuh tih kan hmuh hmaih awm love. Khawvel hi a danglam reng a, zangkhua pawh hi tute emaw tan chuan a bungbu reng tho a ni, tih hi theihnghilh loh a tha awm mang e.

Zirtirtu thenkhat huatthlalak zia hi chuh! An zirtir tawh thin, an school naupang tupawh an hmuhin an mahni tluk ngai miah lo tur leh an zirtir lai huna an thiam bak thiam belh rih lo tura ngai tlat hi an awm pek a. Manganthlak thei hle mai. Hmana mi pakhat dinhmun kha tunah a pangngai reng theih tho laiin a danglam thei bawk a ni, tih hi hriat hmaih loh a that hmel. Pathianin mihringte a pek thluak hi tiam chin nei lovin a thang lian thei a ni tih kan hai emaw ni le?

Theology zirmiten Secular zirhote kan hmu Pathian thu lo mai thei. Mahse Thilsiamte hmanga Pathian inpuanna (Natural Revelation of God) subject an la ve mek a ni si a. Secular zirten theology zir an hmusit viau em ni? Mahse hawvel finnain a hriat sen loh Pathian mizia, a thiltihdan leh duhdan hriat then tum chin an ni a, ngaih nep mai chi an ni chuang dawn em ni? Nangni zir nge tangkai keini zir zawk hi? tia in hnial aiin mahni thiamna zawn theuh atang khan kan chenna khawvel leilung leh mihringte hi tihhmasawn tum theuh ila. Chu chuan zirna rah chu a phawk ber ang. Zirna chuan mahni pumpui chawm mai chauh a kawk lova, chenhona tha siam lama thawh a kawk tel  a nih kha. Taksa pumkhata invuah tlat peng hrang hrang mai kan nih in hre nawn leh ila.

Heng hi kan chenna hmuna bet tlut leh kan thawhna hmuna awm deuh chawrh thin rilru pu mi kan nih chuan kan World View tur chu an ni mai. Mahse World View hi a tet lutuk a, a zim viau chuan kan chenpui midangte nena kan indawrnaah harsatna tam tak min thlen thei dawn a ni reng mai. Tunlai khawvelah chuan World View tizau thei apiang leader nih theihna an nei sang ting a ni tawh. World View chu lehkha chhiar, mi kawm tam, subject hrang hrang hriat ve teuh theiha chuta an intangkaipui tawn dan te hriat thiam, midangte hnathawhna, chenna hmun ena hriat thiamsak te leh an boruak tawn azira an World View tur hriat dawnthiamsak thei apiang mi nihlawh an ni ang a, organizing an thawk thei dawn a ni reng mai. Mi World View hriatsak tum lo lutuk mi intifel tak tak kan tam a ni. Han hrilh ve deuh pawh a, aw… e.. liam puat puat kan kuh tul.  Ril lo lutuka in..um... e sak te hian a chang chuan luakte hi a tichhuak a nia.

Dam dawi ina kan thawh vangin OBD tih hi kan hre lar hle pawh a ni mahna. Mi zawng zawngin hre tur hialin kan lo ring mai thei. An hre teuh lo mai. Bible School lam nena inkungkaih mirhingten JEPD kan hriat vawi vawi nen, Computer lam khawihpa chuan hmu sela thlalak format hmiing JPEG ziahsual emaw a ti duh lek ang. Chutiang bawkin TOEFL zirtir thin chuan TWE kan hre lar hle a. Mi zawng zawngin hre hial turah kan ngai a. An hre meuh lo. Health Relief NGO ah kan thawh avangin WATSAN tih hi ka vaibel tih khawpin kan hre mai thei a. Mahse midangten min hriat thiampui chiam leh pek lovang. Education Specialist kan nih vangin SENCO tih te TOT tihte hi kan tapchhak tawng ang tluk a ni na a, midangin an rim a ra pawh an hre lem lo. Beisei duh ting lo mai ang.

Kan hnathawhna theuh a inan loh avanga kan hman thin hmanrua leh tawngkam bungrua te hial mah chuti tluka kan inhriatpui loh chaun kan World View phei chu tihngaihna awm lo khawpin a inpersan tawh ang. Chu inpersanna tak chuan chenhona leh indawrna a tikholhkham thin a ni. Mi a tam thei ang bera kan dawr hlawhtlina Community leader nih tum a, khawtlang siamthatna lama meikawha tanlak tum, mi tak sa tak, chin chuan kan World View kan tizau tur a ni dawn lawm ni? Background chikhata mi mihringpui chauh lo lawm (appreciate) nachang hria kan nih chuan tunlai khawvel dinhmuna hruaitu nih kan tling lo phawt. Khawvel hmun hrang hranga cheng mi chitin reng world view kan khung leng (include) zo lo a nih pawhin a ni lo berah Zofate kan inzam darhna background hrang hrang atanga awm thei World View tal hi kan World View hian a dawngsawng (appreciate) thiamin a man (subscribe) thei tur a ni dawn lawm ni?