YMA HIAN " EITUK DO KUM " PUANG SELA

-James CVL. Thafamkima

Mizorama pawl chak ber mai leh thiltithei ber mai kan YMA ten "ruihhlo do kum" an han puang a, zan tai rek thleng thlengin mi kawmkarah biruin thil sual titu man tumin an vai peih a, an thawm a na a, a nghawng pawh a na bawk. Khawlaiah zu rui hmel hmuh tur an awm ngai mang tawh lova, zuin ringawt pawn thil sual ti ta ang riakah an inngaih tak hi. Hetih lai hian tlawmngai pawl dang Mizoram Upa Pawl te chuan "eiruk do kum" te an lo puang ve bawk a, anni ngaimawh hi nge kan YMA te ngaimawh hi pawimawh zawk ang tih hi ka ngaihtuah thin. Eirukna hian nge kan ram hi tichhe nasa zawka, kan do mek ruihhlo hian ? A tichhe ve ve tih chu kan hria a, mahse, kan ngam zawk leh kan huphurh loh zawk kan do mai niin a lang. A chhan chu, ngun taka i chhut neuh neuh chuan, eiruknain kan ram a tihchhiat zatve pawh hian ruihhlo hian kan ram hi a tichhe lo tih hi i hre thei mai ang. Eirukna chuan kan zavai maiin min nghawng a, kan duh emaw duh lo emaw a tuartu deuh vek kan ni a. Eirukna hlawkpuitu chu tlem azawng an awm ngei a, mahse, a hlawkpuitu ai chuan a tuartu chu a let engemaw zatin kan tam leh bawk. Kan khawpui lian ve deuh hoah pawh eirukna hmel chu hmuh theihin a langchhuak fer fur a, mahse, sawi sep sep bak chu tih ngam kan nei mang hauh lo chu anih hi.

Kan tun dinmunah chuan mihausa leh mirethei kar hi a zau lutuk mah mah a ni. Tunlai hian kan Mizo website thenkhatah chuan kan ram hruaitute Thlam thlalak te an tar lang a; mak tih a hlawh hlawm hle a. Thingtlang mi tam zawkte chenna In aia tha thlam sak te hi kan Politician-te hian Thingtlang tih hmasawnna aia an ngaihpawimawh zawk a nih miau chuan beidawnthlak tak a ni. Kan ram chhung kawngte lah a chhiat em em laiin, kawng tih hmasawnna aiin motor tha neih te hi kan ram hruaituten an lungkham zawk miau si chu anih hi.Kan Politiciante chauh hi eiru an ni hauh lo tih chu kan chiang khawp mai. Sawrkara hna lian tham chelh ho hi an thil neih leh an ram neih te han chhutpui la, chutah an thlatin hlawh pawh chhut bawk la, tichuan tunge eiru-a eiru lo chu i fiah uarh uarh mai ang.

Kum 2008-ah inthlanpui kan hmachhawn leh dawn a, hemi atan hian kan YMA hian hna thawh tur pawimawh em em mai a nei niin ka hria. Khawi Party mah hi a tan a ngai lem lo. Mahse, mi dik leh mitha thlang chhuak turin kan infuih hi a hun tawh. Mipuite hi kan mawl rei tawh lutuk. Tunah rih chuan eikhawp ka la thawkchhuak thei rihin, a tu pawh rawn sawrkar sela, ka thlaphang lo a ni thei e. Mahse, hei hi kan hriatchian a ngai; kan ram dinhmun hi a chhe em em a, a siamtha tura midik kan thlan loh leh ngat chuan beisei loh hi kan ramah a lo thleng dawn. Thawhchhuah nei lo ramah hian sum hi a tam reng thei lo tih hi awih lo mah la thudik a ni. Kan ram a rawih tial tial a, loneimiten zirtirna tha tawk leh chhawmdawlna an dawn miau loh avangin an kumtin tharchhuah hi a tlem tial tial anga, thilman sang chho zel leh vai buhfai leh sahriak man sang hi an tawrh zawh loh hun a lo thleng ang. Chumi hun chu lo thleng lo tura ka duh anih chuan kan YMA te hian hma an lak a hun tawh tak meuh a ni. Hawh u, i inzirtir hlawm ang u. Khawtina YMA Branch tin hnenah inthlan thianghlim a awm theih nana ngenna siam satliah mai mai lovin, a theih ngat phei chuan candidate ho inhnialna hun, mipui hmaa hmaichhana intawngna hun siamsak theuh ila. Constituency tinah hei hi YMA hian buatsaih ngei sela, tichuan, mi tha chu mipuiin an hre thei ngei ang. Tin, YMA hruaitute hi zin kualin Mizoramin midik leh tha chauh thlan kan mamwhzia hi khawtinah tlangaupui sela. Chutia theihtawp kan chhuah a, mipui kan zirtir hnu pawha kan thlan ten an eiru leh cheu anih zawngin kan hmabak chu a ko lo tawh ngawt ang. Tun dinhmunah pawh hian thalai zingah hel pawl din mai duhna chi hi a intuh mek tawh a. He thil hi fimkhur taka kan enkawl chhoh loh chuan, he Kristian ramah ngei hian inrukbona leh inrikrapna, tharum hmanga sum leh pai inchhuhsakna ni a la rawn herchhuak ang. Mahni chanai changlote chuan an chanai chang tura an beih chu a thiang a ni lawm ni ?

Kan ram hian hma kan sawn a, tuna kan dinna atanga hmalam pan zel tur hian tihtak zeta 'hlemhletna leh eirukna' hi kan do a ngai tawh a ni. Bangalore Mizo Association chanchinbu, Chhinlung Volume XVIII-na a kan thupui ber chu corruption chungchang a ni a. He chanchinbu kan buatsaih lai, thuziak tha tak tak mai a lo luh zut zut lai chuan ka rilruah heti hian ka ngaihtuah a, "Tihian Chhinlung te pawh hi mi tam takin an lo chhiar anga, mi thenkhat rilru chu chawhharh a ni ngei anga, mahse, a tak ram thleng tur khawp chuan tumah an chechhuak leh chuang lovang " tiin. Mipui hian eirukna te hi ngaiah kan neih tawh. A eiru thei ten an eiru a, a zarzo phak ten a zar an zova. Mipuiin kan hmu reng a, mahse menah kan thlak lo va. Hmuhsit aiin kan la hlauh tlawn hlawm ta lai a. Mipui lam hi inzirtir fe kan mamawh a, chumi ti tur chuan kan ram tlawmngai pawl lian ber mai YMA hian hma la se ka ti a ni.

Zu zuar kut kan thlak chawrh chawrh a, an In hial kan hal sak a, khawchhunga awm ve tlak lovah chhalin kan hnawtchhuak a. Zuin, inla pawr deuh chu kan sawp hrep duh a, zahpahna nei lo lekin kutthak hnawih nan pawh hman kan hreh lova. Dik chauh chuan hengmi, ram hmelma kan tihte thiltih aia a let za chuang hian eiruk hmang ho hian kan ram hi an tichhe nasa zawk a sin. Ram hmangaih vanga penchhuak a, ram hmangaih vanga zu zuar ngal khawn tliahsak ngama, ram hmangaih vanga zu zuar bang tlawhthla ngam tu ngei hian ram hmangaih vangin eiruk hmang leh eirukna hi kan do ngam ve dawn em le ? Zoram thalaite u, engtiknge eiruk do kum kan puan dawn le ?

Thulakna : www.zawlbuk.com