Zawngte leh Vahmim

Hmanlai hian Zawngte leh Vahmim hi an awm a, Zawngte chuan phenglawng a nei a, a tum hlerh hlerh thin a. Zawngte phenglawng chu Vahmim chuan tum ve a chak em em a, tum ve a dil thin a. Nimahsela, a tumtir ve phal ngai lo va. Tum ve dan tur mawlh a ngaihtuah thin a.

Ni khat chu Zawngte kiangah a va kal a, “Zawngte, i phenglawng chu ka lo tum hawh ve ang e,” a ti a. Zawngte chuan, “Ka phal lo, i tichhe palh ang,” a ti tlat a. Vahmim chuan, “Ka tichhe lo vang,” a tih pawhin Zawngte chuan, “I tichhe palh ang ka phal lo,” a tit  at zel a. Vahmim chuan a tum ve chak em avangin Zawngte chu biak bum dan tur a ngaihtuah ta a. “Zawngte, i nu’n tui lo chawi rawh se a tih kha,” a han ti a. Zawngte chuan inti thei tak hian, “Chawi zo tawh dim diam,” a ti a. Vahmim chuan tih dan dang a ngaihtuah leh a, “Zawngte i nu’n thing lo phur rawh se, a tih kha,” a han ti leh a. Zawngte chuan, “Phur zo tawh dim diam,” a lo ti a...

Vahmim chu a beidawng duh chuang lo va, “Zawngte, i nu’n chaw lo chhum rawh se, a tih kha,” a’n ti leh a. Zawngte chuan thawveng takin, “Chhum zo tawh dim diam,” a ti leh a. Vahmim chu a inngaihtuah vang vang a, a tawp a tawpah chuan, “Zawngte, i nu’n lo mu rawh se, a tih kha,” a han ti leh a. Chu veleh Zawngte chuan, “E ni tak,” a ti a, Zawngte chu a mu ta a.

Zawnte mut veleh chua Vahmim chu Zawngte bulah chuan a va kal hnai den den a, Zawnte phenglawng chu a la thut a. Chu veleh Zawngte chuan a mei-ah a man a, a mei chu a til ta thawt a. Vahmim chuan Zawngte phenglawng chu a tlanpui ta daih a. Mei a nei ta lo va. Phenglawng chu a tum ve ta a. Nakinah chuan, “Zawngte, mei mi pe, mi pe, hmim hmim,” a va ti a. Zawngte chuan, “Sil riatin tlan ta che,” a lo ti a. Vahmim chuan sil riata tlanna a nei si lo va. “Sil riata tlan ai chuan mei lovin ka awm nang e, hmim hmim,” a ti a, a kalsan ta a. Chuta chin chu tun thleng hian Vahmim chuan mei a nei ta lo va, mei bulin a awm phah ta alawm.