Sorkar laipui in naupang kum 6 leh kum 14 inkar hmaihthelh nei lova zirna pek vek na tur ruahmanna Right of Children to Free and Compulsory Education Act hnuaia zirlai hmingziak beih runpui “Universal Enrollment” chu vawiin khan Chanmari YMA Hall a inkhawm buatsaihah bul tan a ni ta.
He inkhawm urhsun taka buatsaih hi Education Secretary Pi Esther Lalruatkimi’n a kaihruai a, Education Minister Pu Lalsawta chuan beihpuithlak tan hun a hmang a. Education changtu Parliamentary Secretary Pu Chawngtinthanga leh SSA Project Director Pu T. Rohmingliana te pawh an tel a ni.
Pu Lalsawta chuan vawiin inkhawm chu Mizoram puma naupang kum 6-14 zawng zawng ten sikul an kai ngei theihna tur atana beihpuithlak bul tanna a nih thu a sawi a. He dan kenkawhna kawngah hian harsatna hrang hrang avangin khawlhkham lo siam an awm thei a, chutih hunah pawh zam hauh lo leh thahnemngai taka an mawhphurhna hlenchhuah hram dan tur ngaihtuah chu kalkhawm te leh Mizoram hmun hrang hrang a Elementary School zirtirtute kovah a tla a ni, Minister chuan a ti bawk.
Parliamentary Secretary Pu Chawngtinthanga chuan zirna hi ram chhung leh ram pawna Mizote hmel tithatu, Mizoram hmasawnna tur atan a thil tangkai hmasa leh pawimawh ber a nih thu a sawi a. Zirtirtute chu thahnemngai tak a thawk turin a fuih a ni.
Vawiin inkhawmah hian Primary leh Middle School zirtirtute leh Education Department a mawhphurtute an kal tha hle.
Thulakna: DIPR