Mizo lam zinga mawi ber leh lar ber tiha mawi Cheraw hi hnam lam upa tawh tak mai a ni.Kum zabi 13-na ADa Chin Hill an thlen hma leh tuna Mizoram an thlen hma daih atang tawhin Mizoten Cheraw hi an lo lam (kan) thin tawh a,kum zabi 1-na AD - China ram Yunan bial chhunga an khawsak lai atanga an lo chin tawh nia ngaih a ni.A tir takah chuan Khawhring hnawhchhuah nan leh mitthi thlarau hnar nan Cheraw hi lam thin a ni(Nu,raichehin a thi a,nausen ngaihtuah lutuk vangin a thlarau chu nausen bulah a awm reng tlat thin , niin hmanlai Mizote chuan an lo ngai).Hun a lo kal zel a, Cheraw chu "Buhza Aih "(Buh Thar That Lawmna) lam bera hman a lo ni chho ta a.Tichuan , tunlaiah hi chuan kut , hlawhtlinlawmna ni , hlimhlawp ni leh ni pawimawh dangahte Cheraw hi lam a lo ni ta a ni.
Mizo hnam lam Cheraw hi khawvel a ber kaite ziakna Guiness World Record-a chuang turin Mizoram chuan hma a la nasa a,kan phur tlang a,a ropui teh e.Mahse,enga ti nge "Mass Bamboo Dance" tih a nih kher le? Mizoten "Bamboo Dance" kan nei lo. "Cheraw" a ni tawp.Khawvel Mizote kan lan vena turah hian uluk ila, kan hnam lam hming dik tak ngei hi vawrhlar tum ila a that dawn nen.Hnam dangin an lam chu "Bamboo Dance" tia an lo letling a nih pawhin Mizote hian kan hnam lam hi "Cheraw" tiin vawrhlar tum hram hram ila...Hawh u, "CHERAW" I TI HRAM HRAM ANG U.