Thlalak hi Kuala Lumpur khawpui chhunga awm Cheras venga “mihring-bawm/ mihring paihna bawm” a nih hi!!! Chhai raw! Bawlhhlawh chu paih ngai a ni a, mitthi pawh leiah phum/ hal ral a ni ngai a, minung inpaih erawh a rapthlak lua lo maw?
Malaysia-ah kum tinin nausen 100 vel, an nu / paten kawngsir, bawlhhlawhbawm , luikawr-a an paih chhiar thin a ni. He'ng nausente hi hmuhchhuah an nih meuh chuan a tam zawk chu an lo thi hman tawh thin a ni. He’ngte avang hian sokar, tlawmngai pawl leh mi thahnemngaite chuan pawi sawi lo nausen chhanhim dan tur nasa takin an ngaihtuah a, hetiang hian nausen paihna bawm hi a lo chhuak ta a ni. Hmun dangah pawh hetiang “mihring-bawm/ mihring paihna bawm” hi a la awm nual rin a ni.
Malaysia-ah hian mihring maktaduai 28 (28 millions) vel chengin, zaa sawm ruk (60%) vel chu Muslim Malay an ni. Kum 16 hnuai lam hmeichhia pawhin Islamic Sharia court phalna-in pasal an nei thei. Nikum (2010) December thla-ah pawh, kum 23-a upa Abdul Manan Othman-a’n tleirawl kum 14-a upa Siti Maryam Mahmod-i a nei a, tlawmngaipawlten kum tling lo nupui neih thubuai siamin sorkarah an theh lut na a, sorkar chuan engtin mah a ti ta lo a nih kha! Malaysia-ah hian nikum khan hmeichhe kum 15 hnuai lam mi 16000 velin pasal an nei a ni.
Mihring hi ransa ang leka siam kan ni lo a, mipat hmeichhiatna hi ui leh a rang leka hmang tur kan ni lo. Mahse, kan tunlai khawvel han thlirin, mipat hmeichhiatna hman khawlohna a hluar tual tual a, fahrah an pung tual tual si a ni. Hawh teh, nang leh kei tal hi chuan nun kawng dik zawhin, mihring hlu nih i tum ang hmiang. (BBC, The Star, Hello News)
@ Thlalak min rawn thawntu kan palai, Cheras-Kuala Lumpura khawsa hnenah lawmthu kan sawi e.