MIZO MIZONA HUMHALH

Sakuh leh Sakhi

06/12/2010 21:20

Hmanlai hian Sakuh leh Sakhi hian lo neih tumin an vat ve ve a, Sakuh chuan uluk takin a vat a, perhte nen lam a hawl fai vek a, a hain thingzungte chu a sehchhum a, a hah em em mai a. Sakhi chuan a vat tha ve peih lo va, a ngalin thingte chu a kheng tlu mai mai a, hah pawh a hah ve lem lo va. An lo vah chu hal a lo hun ta a, Sakuh lo chu taima taka a vah avangin a kang fai tha hle mai a. Sakhi erawh chuan a thatchhiat avangin a vat uluk ve lo va, a kang fai ve thei ta lo va, sanghar ar rawh pawh a tluk pha ta mang lo va. Buh tuh a lo hun ta a, Sakhi chuan a fin rawl a chhuah a, Sakuh loah chuan buh a tuh ta tlat mai a.

Sakuh chuan a lo hriatin, “Eng vangin nge ka lo-ah buh i tuh rik ngawt mai? ” tiin a zawt a. Sakhi chuan, “I lo hi a chhe zawk a ni a, chuvangin buh ka tuh ta mai a ni,” a ti a. Sakuh chuan a pawmzam thei lo va, rei tak an inhnial ta a. A tawpah chuan Sakhi chuan, “Hetianga inhnial ringawt hian awmzia a nei lo va, inbuan ila, a chak zawk zawkin lo chu chang ila a ni mai,” tiin a rawt a. A ngaihdanah chuan a len zawk em avangin Sakuh chu hneh zawk fe turah a inngai a. Sakuh chu a lo diau duh bik hauh lo mai a, “Ni ang hmiang, i ngama thu le,” a ti ve ta a. Tichuan an inbuan ta a.

Sakhi chu lianin chak hmel zawk mah sela, Sakuh chu a tuan a tha ru riau va, rei tak an inbuan hnu chuan a chak ta zawk a. Nimahsela, Sakhi chuan a ngal ruh nat chhuanlamin inbeih nawn leh a rawt a, a ngal chu puanthemin a tuam a, tichuan, an inbei leh ta a. Rei ngial an inbeih hnu pawh chuan Sakhi chuan a hneh thei ta chuang lo va, Sakuh chu a chak leh ta zawk a. Sakhi chuan a la pawmzam thei chuang lo va, a nghawng nat chhuanlamin inbeih leh a rawt ta a. Vawi thum an inbeihnaah pawh chuan Sakuh chuan a hneh leh ta a. Nimahsela, Sakhi chuan an lo inchuh chu a pe phal ta chuang lo va.

Rawtna dang a siam leh ta a, “Kan thiante zawng zawng ko khawm ve ve ila, i indo ang u. Chuta chak zawk chuan lo hi kan nei ang chu,” a ti leh ta a. Sakuh chuan rem a ti ve leh mai a, tichuan, Sakuh leh Sakhite chu indo tur chuan an inpuahchah ta a. Sakhi chuan thian a ngah khawp mai a- Saite, Sele te, Sakei te, Savawm te, Sanghal te, Zawng te, Satel te a sawm chhuak a. Sakuh erawh chuan thian a nei ve ta mang lo va, tanpuitu atan Khuai chauh a sawm hlawhtling thei a.

Sakuh chu a theih ang angin a inah Sakhi leh a thiante do tur chuan a inpuahchah a, Khuai zawng zawng chu zu belah te chuan a khungkhawm ta ve a. Nakin deuhvah chuan sakhi chuan palai atan zawng a rawn tir a. Zawng chuan lo chu Sakhi a pe dawn nge dawn lo tih a rawn zawt a. Sakuh chuan an lo inchuh chu a pek mai loh tur thu a lo hrilh ve a, Zawng chu khawizu no khat a lo pe a. A lawm em em mai a, “Sakhi nen in inkarah remthu sawi ka lo tum ang e,” tiin a kir leh ta a.

Zawng chuan thil awmzia zawng zawng chu Sakhi hnenah chuan a hrilh ta vek a. Sakhi chuan palai dang a tir leh ta a. Chutia palai hmel a hmuh leh takah chuan Sakuh chu a lawm lo zual ta hle mai a, Sakhi leh a thiante chu a cho let ve ta a. Sakhi leh a thianteho chu Sakuh do tur chuan an thawk chhuak ta a. Sakuh in a va thlen chuan, Sakuh chuan, “Kan indo tak tak hmain invai khan ka zu hi rawn in teh u,” a ti a. Tichuan Sakhi leh a pawlte chu an va kal a, an vain in chhungah chuan a luhtir a. Kawngkhar zawng zawng chu nghet takin a khar vek a. Zawng hnenah chuan, “Nang zawng a palai i ni a, zu hi in hmasa ber tur a ni. Zu bel lian ber hi han hawng la i hawn veleh bel chhungah i lu rawlh nghal ang che, chuti lo chuan zu rim tuina kha a chhuak vek palh ang e,” a ti a. A hmaa a lo in tawh avangin a tui zia a hre tawh a.

Zawng chuan zu bel chu a hawng a, a luhchilh tan ngar ngar mai a. Khuaite chuan Zawng hmaiah chuan an lo zuk a, a na ti chuan a tlan vir ta chiam a, chutih lai chuan Sakuh chu rappui chung sangah a lawn ta daih a. Bel chhunga Khuai chu an rawn thlawk chhuak ta a, in chhunga awmho chu a zuk ta nghek mai a. Ramsa ho chu Khuaiin a zuk avang chuan an buai ta nuaih nuaih mai a, an ta buai chuan bel dangte pawh chu a tikeh zel a. Khuai chu an rawn thlawk chhuak tam deuh deuh va. Ramsaho chu an zuk hlum ta vek a.

Sakuh erawh kha chu chhuah rukna a siamah a chhuak ru daih a, Satel tih loh chu ramsa dang zawng chu Khuai chuan an zuk hlum ta vek a. Nakin deuhvah chuan Sakuh chu a inah chuan a lo kir leh a, ramsate chu an thi vek a, Satel chauh chu a dam chhun a ni tih a rawn hmu a. Ramsa thite sa chu a duh lai lai a help thla a, Satel hnungzang chu sahchhanah hmangin, “Nang mirethei pa, ka kuh pakhat hi ka pe ang che’ng a, in lamah haw rawh khai,” a ti a, a kuh pakhat a pe a, Satel chu a haw ta a.

Satel chuan Sakuh kuh pakhat chu a samah a tawn a, a intithei khawp mai a, a kal thle bak bak mai a. A haw kawngah chuan Sakei nu leh Savawm nu te buzawl a va thleng a, Satel chu thing kaw rawngah lutin ring deuh maiin a han tiri a. A thawm chu an hriatin ramsa dangte chu an lo kal khawm a, Satel , hnenah chuan, “Khawiah nge kan pasalte? ” an lo ti a. Satel chu a tawng tha duh mang lo va, intithei takin a hawi kual vel phawt a, “In pateho chu an thi vek a, kei chauh hi a dam chhun ka ni e, Sakuh chu ka va that a, a kuh pawh ka tawn vah hi,” a ti vel a. Sakei nu leh Savawm nu chuan Satel thusawi chu an ringhlel a, Sakuh in lamah chuan thu chiang zawk hre turin an kal ta a.

Sakuh in an va thlen chuan, “Satel chuan a that lo che em ni? ” tiin an va zawt a, Sakuh chuan, “That suh e, ka kuh pakhat a tawn kha ka pek a ni a, ani ang mi vanduai thusawite in awih reng ni. A hnungzang kha sa sachhanah ka hmang a, in enchian chuan ka sa chhanna hnuhma in hmu ngei ang,” tiin a lo chhang a. Sakei leh Savawm nu te chu an kir leh ta a. Satelin dawt a hrilh avang chuan an thin a rim em em mai a, “Min bum a ni,” an ti a, Satel chu an man a, thingkakah an zep ta a.

Satel chuan hreawm a ti hle mai a, a tal a tal a, tihngaihna dang a hre si lova, “Min tihdan hi a na hle mai a, lei si lo van si lova awm reng ai chuan ka tan thih a tha zawk e, Ka mei-ah na takin min vua ula, tichuan ka lu a lo dahchhuah veleh min sehhlum mai rawh u,” a ti ta ngawt a. Satel sawi ang chuan a meiah an vaw vak a, a lu a lo lawr veleh chuan an lo seh a, an sehhlum ta a. Tun thleng hian satel hnungzangah chuan Sakuh sachanna hnuhma a la lang reng a ni, an tia lawm...

Thulakna: Mizo Thawnthu Vol. II by Lalhmachhuana Zofa

 

Comments

No comments found.
 

Contact

Search site

 

 

 

 

                  NGAIHDAN

 

    

     Ngotekherh         Puanchei

   

        Puandum           Hmaram

 

 

 

           THU KAM HNIH KHAT


ShoutMix chat widget

 

 

                TLAWHTUTE


counter globe

 

 

  MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E