Pu Rokunga hla – TURNIPUI KAN DO DAI tih ngaihthlak hian, suangtuahna mitthla-ah fiah tak maiin eng emaw a lo lang a, eng emaw titakin lung a leng em em ringawt zuk nia!!! - Ed.
Kan lenna tlang dum dur, Lenrual kim kan lenna;
Kan thlawh sawmfang hring nghial karah,
Kawltu kan chawi nilen;
Mahse kan zam bil lo, Turnipui hrang hnuaia’n;
Lawm lungrual hlim thawm nui ri nen,
Turnipui kan do dai.
Thangvan dumpawl riai e, Sawmfang hring no nghial e,
Rambuk, Thlam sawngka dawh sanga’n;
Ka thlir ning thei dawn lo.
Ka vau zotui thiangte’n, Hahchhawl dawi ang min dawm,
Mimsirikut leh Thuva te’n;
Hlim zaiin min lo awi.
Kan sawmfang hmun chamdel, Thinlai riang min hnemtu,
Thli te’n rawn chhem an fawn dim e;
Lawm lungrual dung an thul.
Turni hrang vung na e, Zaleng zam lo na e,
Hahchhawl dawi ang min dawm turin;
Lengi’n tui rawn chawi e.
Kan thlawh fang mual lianpui, Zaleng lam ang her nan,
Sirtiang kan sawn kan fawn dim e;
Hlim lai par ang kan tlan,
Tinkim dawn zel ila, Tukram chul hun tur te,
Lenrual kim te’n kan tuanna tlang;
Nghialh ni awm tak ang maw!