MIZO MIZONA HUMHALH

ZAHMAWH BAWM LEH ZOFATE

01/02/2010 00:46
-Vanneihtluanga
Los Angeles-ah ngawt pawh puitling film siamna ‘firm’ 200-ah thawktu 6,000 leh changtu 1,200 an awm a. Kum tin puitling film thar 4,000 - 7,000 an tichhuak thin a ni. LA-ah chuan computer software hna ai chuan ‘puitling hna’ a tam zawk. Zahmawh industry kum khat revenue hi $ tld 4 a tling a ni. Lemchangtu langsar ni lem lo, a vantlang hian thla khatah Rs nuai 2 vel la lut ang an ni.
Internet-a zahmawh zuarte hi an fingin mi thlem an thiam tial tial a, sumdawng rau rauvah an inel nasa hle bawk. Internet khân tinah min chang vek a. TV lamah pay per view hian min rûn leh ang.
He thil khap hi zu khap ang deuh, rawtna tha tak, a taka hlenchhuah theih miah loh thil a ni. Aizawl thalai 80% hian an duh chuan internet an lût thei vek ang. Internet luh tawh chuan en peiha thu a ni mai a. “Zahmawh en suh!” tia khap nachang kan hriat hma-in an tan chuan ninawm khawpa hnianghnar a ni tawh zawk.
Khapa do hneh tum chi a ni lova, thianghlimsan tum chi a ni hek lo. Huaisen taka hmachhawna, zira, he thlipui laka ding zo tura mahni leh chhungkua buatsaih a ngai a ni.
Insit phah suh:
Puitling film-a chang tur hian, hmeltha leh pian nalh bâkah vun nalh an zawng a. Kapkâr lam leh hnute bu lama vantlang aia mit la bîk an thlang chhuak bawk. An eizawnnain a mamawh avangin plastic surgery an uar hle a, hnute lian tamtak hi silicone hnawh puar a ni. Make up artist-in thiam takin an hmai leh kumkar nen an cheisak a, light hmangin an vunrawng an chhun nalh a, camera hmangin thil tereuhte pawh lianpui anga lâk theih a ni leh a, minute nga lek chhunga thil thleng pawh, camera tamtakin kil hrang hrang atanga an lâk a, a hla leh a hnaite a indawta an chhuah kual vak chuan, vantlang aiin an tlin rei daih angin kan hmu ta mai a ni. Hei hi hre lovin film entu tamtakin anmahni taksa leh an kawppuite an sit phah thei. Chu chuan nupa nun a tichhe thei. Hetiang thil i lo en a nih pawhin insit phah nan hmang suh.
Entawn duh suh:
Film pangngai ang thovin, i en tura siam a ni a, i entawn tura siam a ni lo. Film pangngaia lem changtute nui leh thinrim te i hmu ang tho hian lem an chang a ni tih theihnghilh suh. An tihdan leh an lantir hi mi changkang zawkte tihdan emaw ti suh. A taka i tih ve atan an zirtir che a ni lova, i suangtuah (fantasize) liam mai mai atan an entir lek a ni. I chan phâk loh changa nuam ti fal bik angin thîk suh. I pawisa îtin nuam lem changin an inhlawh a ni. An thua awm angah inngai lo la; i thuneihna hnuaia awm, i duh hun huna i tlanbosan theih an ni.
An fit:
Hei deuh chiah hi puitling film-a entawn tlak awmchhun a ni. Hmanlai chuan lengzem hla satu zaithiamte zingah kuhva heh leh thing tak tak an awm a. Tunah chuan inthunun thei hlei hlei an ni ta ang hian, tunhma chuan he chantualah hian ruihhlo ngai leh mi tawpte an chang thin. Tunah chuan, eizawnna lian tak a lo nih tak avangin taksa an uluk a. Pian nalh chungchuang ni turin an insawizawi a, ei leh in an uluk a, zûk leh hmuam phei chu an ti hauh lo vang. Hri (AIDS etc.) laka an fihlimna certificate nei lo phei chuan (US-ah chuan) an tel thei tawh lo a ni. Mipat hmeichhiat nawmna vawrtawp chên thei tur chuan, fit a ngai hle tih hei hian a entir a ni.
 A sexy miah lo!
Nulaten hetiang film an en fo hian sexy riauin an hria a, chan ve châkna neiin thlêm an sam riau thei niin an sawi. Mahse maw... khumah saruakin i mu ang. I chhehvelah cameraman bakah, boom mike leh light kengtu rawlthar hâwkdâk tak tak te, make up artist te an phu sup sup ang. Hnai takah Director-in a bih ang che. “Lights, Camera, Action!” a han ti ang a, kil thum laiah êng nasa takin an chhun ang che. Camera hovin, ‘Min hawlh a tum em ni’ tih tur khawpa hnaiah an rawn veh ang che. Zaizirin, “Au ring rawh!” titu an awm, “I kutin hliah suh!” lo ti tawk nen, i phur loh leh i chang thiam lo a ni mai a, i phur vanglai takin “Cut! Change Position!” an ti leh si ang. A nuam i tih leh tih loh aiin i kumkar i tihlan leh lan loh an ngaihven zawk. Romance tam zawk chu thawnthubu-ah chiah a awm an tih ang deuh hian, nuam nia i rin tamzawk hi chu i thil hmuhah ni lovin, i suangtuahna lamah a awm zawk a ni. Nuam lem an chan hian nangin zahmawh i hmu a, anni chuan pawisa an hmu daih ang! I tan nawmsip thlakhlelhawm tak a ni a, an tan chuan... industry a ni. Awt suh.
A letling:
Thawm neih hlauva insum hi dan a nih laiin, anni chuan thawm neih loh an hlau zawk. Kumkar thup thei ang bera tlingtlak hi mihring mai ni lovin rante pawhin an tihphung a ni. Anni chuan leilung danin a thup lai apiang kha min hmuhtir an tum. Nupa chauha inhmantawn a nihna hian a hlutna tihzuala kan ngaih laiin, anni chuan, an film ensaktu an tam zawh poh leh an hlutna zualah an ngai. Anni chuan anmahni entute lungawi nan lem an chang a, keini chuan kan nupa lungawi nan kan ti tak tak a ni. Anni chuan sum duh vangin an ti a, keini chuan inhmangaih vangin kan ti a ni. Kan thiltih a inan pawhin, kan tih chhan a inang lo. Chhungkua leh sakhua-in a zah chithlahna hi thil ho takah an chantir bawk.
Nupa fianrial rohlu an phawrh dahlau a. Inhmangaihte hmanraw sâng ber sumdawn nan an hmang bawk. Leilung danin a roh kha mualah an pho ta a ni. Leilung dana puanhnuai thil tlangzarh hi sual a ni. Hei hian dan pangngai ngaihnepna leh a aia uchuaka mipat hmeichhiat hman duhna a kaithova, uchuak chu thangtharin pangngai emaw an ti ta zel si. Khuanu ro thuhruk hlu tak chu uchuakna salah tantirin a hlutna an tibo a. Vawrtawp ber pawh thil ho a nih tawh chuan damchhan tur kan haihchham a, hringnun hi a ngui tual tual a ni.
A mawl:
Thluak aia taksa pawimawh zawkna zahmawh film-ah hian art a tlêm a, culture zir tur a awm lo. Drama danga plot, dialogue, setting, suspense, treatment... kan tih zawng zawng kha hurna pawnlangin a hliah vek a. A intan dan, inthlak dan leh a tawp dan tur thlengin hriat lawk vek a ni. Ennawm mâwl leh rilru sên ngai vak lo wrestling aiin a mawl fe zawk. Chutiang âtchilh chu mahni inbumna a ni. I âtchilh chuan i mâwl ve tual tual mai ang.
Hekna leh Buaina:
Smart Card i neih ruala internet-a a man chawia en i châk theih nan a tirah a thlawnin an entir che a. Hna ropui tak thawk thei computer chu khawl zahpuiawm takah i chantir a, nawmsip ho tak atan power leh internet hman man i chawi bawk. Game anga chhungkuaa tih chi a ni si lo. Fianrial hun tha tamtak i khawhral a. Insitna leh inrinhlelhna bakah, mi zinga zah rûkna, lectern leh pulpit atanga saruak mitthla palhna, tawngtai laia mitthla dik lo, hrisel lo riauva inhriatna, a fala awm apianga en chakna, engmah dang thlakhlelh lohna, tul miah lova mahni leh chenpuite rinhlelhna, mi bihthlak châkna, nun thununa tlakchhamna leh pawlawh-na te a thlen thei.
Mi inthup a run thin:
Thian kawmna atana zu in ni lova, a fala kal nalh duh chin hi zu ngawl vei an ni fo. Pawn lama kohhran leh khawtlanga mi lawm zawng kan zawn nasatzia leh fianriala kan depdezia han en hian, internet zahmawh thanga âwk thinte nunphung tawmpuitu kan tam a ni. Sap ramah, kohhran, sumdawnna leh politics-a langsar takte hi pornography-ah an mualpho fo. Tunhma chuan khawlaia lei a ngai a, tunah chuan, internet atangin mahni inthupa lâk mai theih a ni. Ualau taka ks dawr hreh si, chhungrila duh ve tho si ang chi hi hetah hian an inhnangfak duh bik. Nun inhawng, fiamthu duh, tawng zangkhai leh mahni rilru ang sawi chhuak thin mi (aggresive) te hian internet zahmawh thlemna hi an hneh tlangpui. Sual sim si lova mi pawi sawi hlau, nun inkharkhip, pawnlanga mawina zawnga inveng thin (defensive) te tan he thlemna hi do a har.
Mizo zahmawh film kan tih hi
Eng eng emaw hi a leng ve neuh neuh a. Hengte hi ngaih-tuahna rawn luahtu a ni.
Thil dik lo:
A tam zawk hi chu an hriat loh hlana laksak an ni. Saruaka tute emaw muhil lai thla ringawtte kan thehdarh mai mai a ni. I fianrial nungchang thla hi i hriat loha lain thehdarh sela, i haw ngawt ang. An harhfim a nih pawhin, an duh lo chung lak luih a ni. An thla laksak an ni tih inhriat ruala inhup leh camera lens hliah tawk tawkte an awm. Heti chunga thla inlaksak leh inthehdarhsak hi sual lian tak a ni. Tin, chhuah chhawn atana an tih a ni lo tih a hriat theih. Ram changkangah chuan, a ‘changtu’ aiin a latu leh thehdarhtu hi an dem zawk ang. Tin, Mizo hmel an put vangin mizo an ni kher lo. Mizo ‘thawm’ anga siam thenkhatte hi a ri thlak (dub chawp) a ni tih a hriat theih. Chhehvela kan anpuite bâkah, khawchhak lam mi an ni thei. Kan hmel anpui apiang hi kan nulate an ni lo.
Thil dik
Thla han inlaksak takah chuan, kan han ‘pose’ ve deuh ang hian, eng eng emaw chu an ti ve a, thenkhat chu zahmawh film en lamah pawh an mikhual vak lo niin a ngaihruat theih. Mahse, camera tha hman a ni lova, inbuatsaih a awm lo. A tam zawk chu a rûka lak a nih bakah, a latu chawp hian an rui niin a lang. Chuvangin, ‘ngaihtuahna’ tel lo kuthlei kutchhuak mai a ni. Thenkhat chu ks class hniam, nalh leh sexy tumna reng reng nei lo, rui, tawp leh tenawm dahkhawm ringawt te a ni a, en a inchhir awm zawk.
Upa lam chuan heng thil hi leng nuai nuaia thalaite hian ngaihven viau turah an ngai ang. Teuh lo! A aia mit la duh hun hunah en peih chhung chu Internet-ah en tur a awm tih an hria. Chuti takin an ûksak lo.
Eng vang nge?
Thiamthil thar kan zo lo: Roll film khawvel atangin digital khawvelah kan lût thut a. Mahni thlalak/video ena nawhreha thehdarh theihna chu camera leh cell phone-ah dah a ni ta. Format awlsam, mpeg leh 3gp te a lo chhuak zel a, size te si, fiah takin a siam theih a, thehdarh a awlsam bawk. He awlsamna-thlemna hi kan zo lo a ni.
Thehdarh kan ching: Thehdarh lo ila, kan mualpho lo a ni mai. Ngaihzawngte timualphova hetia blackmail tumte kan awm ta. Huat theih thil thehdarh hi crime a ni tih hriat tur. Cell phone leh digital camera chhe siam te, video thlalak leh editing-a inhmangte mawhphurhna a lian zual. Pawna fel deuh, chhungrila mi tihmualpho phûr kan tam. Hetia kan tih hian mahni leh kan eizawnna bakah, hnam kan timualpho a ni.
Art-ah kan hniam: Tleirawl lai atanga saruak model entawna painting zir thin saphote pawhin sex hi art anga pawm har an tih laiin, art hlutna hre mumal lova kan education system-in lehkha-thiama min puang mai hi a rapthlâkzia kan hre tan dawn. Fashion show pawh pole dancing thlira thlir tuau tuau khawpa art-a kan la hniam laiin, visual art form pangngai khamkhawp tawh lote zahmawh film-in min rawn nangching ta. Art-a mitdel, sex-a mit keu ve luklak site hian puithuna hmun leh hun urhsunah popular lifestyle kan phawrh a, India rama inchei lepchiah ber hnam kan ni tawh mai thei. Modelling concept kan hai nasat dan te, tuai lepchiah huangtau sawtzia te, mi pakhat thlarau chhandamna atana camping kan mamawh tamzia te leh, kan Bangkok kal nungchangte nena han belhkhawm hian, India rama chanchin tha leh zahmawh film thehdarh tura ruat lawk kan ang ta riau!
Mahse, kan kapkârin a tlin hi kan thluakin a tlin lo thei. A tha zawnga hnam kâwlhrâwng apiangin khawvel an awp a, khawvel awp nasa apiangin mihring rilru sûkthlek eizawnna atana chantir an thiam a, zahmawh film pawh an siam tam nge nge. Chu game-ah chuan nai tak kan ni.
A hlauhawm ber chu:
Danpui khap thil hi ualauva tih theih a ni lo. Thai leh Chinese hming invuahin, Mizo a ni/ni lo tia inrinsiak luai luai tur a la tam ang. A tih theih dan sawi chu inkawhhmuhna a ni dawn... sawi thui lo mai ang. He thil hi kan tih chuan chhan pahnih a awm thei:
1. Retheihna: Rual awt tawk chiaha hmasawn, hand-set leh top-up leisaka thlem theih tawk velte tan hian he thil hi a hnai a ni.
2. Thinrimna: Ualau takin tuten emaw kan chanai an eiru a, kohhranah leh khawtlanga inhman an thulh lo va, zah tâka ruangin an la chapo zui a. Zahawm anga inlantir an la tum vei maw. Khaw’nge ka’n che ve ang e.... tih pahin silai... ni lo, saruak ralthuam hmangin min elsen vak thei. Thisen chhuah lo mah se, hei hi terrorism thinlung atanga lo chhuak a ni thei. I do zawh poh leh a punlun ang. Felna phena sual biru hi felna hian a hliah zo ta lo. Kohhran a inenfiah a ngai. Report loha sâwn pai hmu thei miah lo leh, a paitu thununa, a paitirtu thupa kohhran rawngbawlna hlihsak si loh te kan hre ta fo mai. I fa paitu tih i hriat rûk ngeiin zahmawh film hmanga a elsen che chuan i thlarau nun a sawp chau fe ngei ang.

 

Thulakna:www.lengzem.info

Comments

Date 13/11/2012
By Bt-a
Subject atha ka ti khawp mai...

ka thalai pui zawng zawng te chhiar ve atan ka duh tak zet ani... hetiang lam hi sawi hreh ah kan nei tlat mai a chuvangin he tiang a tlang tak a sawi a athat loh na lai nen fiah tak a sawi thei hi kan mamawh reng ani...

Date 26/10/2012
By Khiangte
Subject k comment lo thei lo

Chhiar a manhla hle mai....! Hetiang lam inhrilh hriat hi kan zoram khawvel hian kan mamawh takzet a ni. Keipoh ka harh uarh mai. Tha ltk...

Date 08/09/2012
By Bena
Subject I thil ziah hi

E kapu nang nge2 ilo ropui e,he i thlirna hi ka ngaih dan chiah ani e,kan hriat loh tha2 rawn phawrh zel rawh thalai te hian inzirnan kan mamawh ngawih2 ani.

 

Contact

Search site

 

 

 

 

                  NGAIHDAN

 

    

     Ngotekherh         Puanchei

   

        Puandum           Hmaram

 

 

 

           THU KAM HNIH KHAT


ShoutMix chat widget

 

 

                TLAWHTUTE


counter globe

 

 

  MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

Free website Webnode

MizoMizo Kan Nih Kan Lawm E