MIZO MIZONA HUMHALH

ZAWLKHAWPUI-AH CONDOM

08/02/2010 21:13

AIDS natna umbo nana hmalakna pawimawh tak pakhat chu condom sem a ni a, Zofate zingah pawm a hlawh lem lo fo. Tunah erawh Zawlkhawpuiah a hmehchhuahna khawl hmuh tur a awm ta nual mai.
Tunah hian Aizawl khawpuiah condom hmehchhuahna khawl "Condom Vending Machine) 9 hun a ni a, a duh apiang tan condom a hmehchhuah theih. Rs 5 sen a ngai thung.

Condom hi MSACS (Mizoram State AIDS Control Society) chuan an hnuaia NGO (Volcomh, Shalom etc.) te hmangin an sem thin a, anni hian hmun hrang hrangah outlet neiin an lo sem thin a ni. NGO-te hian Peer Educator (PE) an nei a, anni hian an semkual thin bawk. Tun hnaiah ruahmanna thar an nei a, chu chu Condom Vending Machine hmanga condom sem hi a ni.

Condom Vending Machine chu bawm a ni a, hmun remchang laiah hungin, condom mamawhtute tan duh hun hunah Rs 5 thir thlakin condom a lak theih. Vawi khat thlakah hian wallet 1 (condom 3 awmna) a rawn chhuak thin. May ni 28, 2009 khan he'ng bawm hi an hung tan a ni.

MSACS hian bawm 25 an nei a, 9 an hung phawt a, 2009 kum tawp lamah Kolasib-ah 1, Lunglei-ah 2 an dah belh bawk.

NGO hnuaia condom semtute hian dodal an tawk fo a, a chang phei chuan kut te hial an tuar thin. PE te'n condom sem tur an ken changin, khawtlang duty te'n an lo hmuh fuh chang chuan an man a, an sawisa fo. Mizo zingah condom sem chu thiang lova ngai, mipat hmeichhiatna hmang tura infuihna ni hial ngai an tam tih sawiin MSACS hruaitute chuan, "Mipui hian kan la hrethiam tak tak lo a, Kohhranah pawh hrethiam lo kan tam khawp mai. Hei hi kan harsatna ber pakhat a ni," an ti reng a ni.

Chutih laiin a hmehchhuahna khawl chuan an rin aiin lawm a hlawh a, a tir phat atangin an beisei aiin miin an hmang nasa. Amaherawhchu, condom vending machine hi a tir lamah aiin tun hnaiah a hmangtu an tlem hretah ngaih a ni. A tir lamah kha chu, thil thar te a lo ni bawk nen, hmang chhin ve hrim hrim chak an tam avangin AIDS dona atan ni lem lova hmang an tam nia an hriat thu MSACS hotute chuan Zozam Weekly an hrilh.

MSACS hnuaiah hian Aizawlah nawhchizuarte buaipuitu bik NGO pahnih an awm a, chu'ng zinga pakhat zawk Volcomh chuan an office kawta Vending Machine chu nawhchizuarte'n an hmang tha hle tih an sawi.

Volcomh hian an nawhchizuar buaipuite chu condom hmang duh lo hnena inhralh lo turin an fuih thin a, hei hi an zawm tha hle nia hriat a ni. A hranpaa lei ngai lova hetia hmehchhuah mai tur a awm hi nawhchizuarte chuan remchang an ti hle. Chutih rual chuan nawhchizuar tia sawi hleih theih lo, changkang deuh taka inzuar chite chuan condom hman an la phut rih lem lo thung niin Volcomh hotute chuan an sawi.

Tennis Court bula thingpui dawr pakhatah pawh he bawm hi an hung a, a lun ang reng tih a nghaktute chuan an sawi.

"Nawhchizuar te'n an rawn la a, pa leh tlangvalin an rawn la thin bawk. Bakah, chhang tih khatna atan te pawh an rawn la, dawra lei ngam lote tan a tangkai khawp mai," tiin he dawr nghaktu Lalbiakmawii chuan a sawi a ni.

"Miin sex hmang se, condom hi hmang rawh se, kan ti a ni lo. Sex hmankhawloh a hluar a, hmang lo turin kan inzirtirin kan inveng tur a ni. Mahse, kan inveng seng tak tak dawn lo a, a lo hmang luite pawhin condom tal hi hmang se, sex hmangkhawlote hian he natna hi an thehdarh lo deuh ang tihna a ni," tiin MSACS hotute chuan condom sem chungchang hi an sawifiah.

"Condom sem hi thil buaithlak deuh mai a ni a. Kal vang vanga mi va pek ringawt chi a ni ngawt lo. Hmang se kan tih ngawih ngawihte pawh va pek ngawt a rem lo fo a, chu ai chuan mahni mamawh huna lak mai hi a kawng pakhat chu a ni," an ti bawk.

MSACS hnuaia thawk pakhat pawhin, "Nu - thil tisual hauh lote'n an vei thin a, hei hi a runthlak khawp mai. Pain nawhchizuar a kawm a, chuta tangin nuin a lo kai ve thin hi enliam mai mai chi a ni lo. Pa chu kan veng thei lo a, a kawng awlsam chu condom pek mai a ni. Chu pawh a lo duh lo a nih chuan a ngaihna a awm lo. Mahse, nuin a lo kai a, fate thlengin an kai phah theih a," tiin hemi chungchang hi a lo sawi ve bawk.

MSACS lam hian condom hi an sem chhuak hnem hle a, an hnuaia NGO awm te hian an mamawh hunah an la mai thin.

Mizorama Hiv positive tam ber, 70% vel hi mipat hmeichhiatna avanga kai an ni a, a dangte hi chu damdawi hman khaw loh leh thil dang vang a ni. Mizoram pumah nikum August thla thleng khan AIDS vanga thi zat mipa 97 leh hmeichhia 67 an awm tawh, niin MSACS lam chuan an sawi.

Tun hma deuh chuan damdawi hman khaw loh avangin Aids hi nasa taka inkaichhawn nia ngaih a ni. MSACS-ho hian kum 1990 atangin data hi an lakhawm tan chauh a, a tirah chuan inkaichhawn awlsamna ber leh inkawichhawn nasatna ber chu syringe thianghlim lo intawm vangte nia ngaih a ni.

Mahse, tun hnaiah chuan damdawi hman khaw loh vanga inkawichhawn chu a nasa tawh lo, mipat hmeichhiatna atanga inkaichhawn chu a nasa ta ber zawk a ni.

MSACS project director Dr. Eric Zomawia chuan "nulate hian Aids aiin rai an hlau zawk" tiin fiamthu ti takin a sawi. Chu chuan inzirtirna lam ngawrh zawka beih a tulzia a lantir awm e.

“Kan rin phak bakin Mizoramah AIDS vei an tam ang,” doctor pakhat chuan a ti a, “Mi pangngai kan tihte hian a ni vei ni. Sawichhuak duh se chuan mak kan tih tur hi an tam khawp mai,” a ti.

He doctor hian nakin lawkah chuan zu tih vel ai chuan AIDS hi Mizoramin a la buaipui bera a rin thu a sawi.

“Ruihtheih thil hi kan do nasa a, a tha. Mahse, Aids hi do ngai ber zawk niin ka hria. Kan inkai chhawn tam ngawt bawk ang. Tihdam theih a ni si lo, a ruka mangang fe fe hi chu kan tam khawp ang,” a ti bawk.

“Condom hman uar loh vang a ni mai a. Ka hriat theih chinho hi chu mipat hmeichhiatna atanga inkaichhawn vek a ni,” tiin a sawi zawm a ni.

Chutih laiin condom pawm lo pawh Mizoramah an awm a, condom hmang tura inhrilh chu mipat hmeichhiatna hmang khawlo tura inhrilhna nia an ngaih vang a ni tlangpui.

"Hetia condom hmang tura kan inhrilh hi, mi thenkhat chuan sex hman inphalsakna emaw an lo ti a, chutiang a ni lo. Mipat hmeichhiatna hi nupa kar lovah chuan hman hauh loh tur a ni a, mahse, a hmang lui an awm reng tho si. Chu'ng mite chuan tihdam theih loh natna an vei a, an thehdarh bawk a. Pawisawi ve lo an nupui/pasal te an kai a, a pawi thui ta em em a ni. Chutiang laka inven nan chuan condom hmang tura inhrilh mai hi a ngai a ni," tiin social worker pakhat chuan hemi chungchang hi a sawi.

Hmun thenkhatah condom hmang tura inzirtir a tul a, a thenin an pawm lo a, chutih laiin thenkhat erawh hrilh emaw zirtir emaw an ngai lo khawp mai, hmai bawl damdawi atan a tha tia hmang thin sawi tur an awm nual mai!

########################

Hmeichhe condom

Mipa condom chu kan hriatna a rei tawh; hmeichhe condom erawh mipui nawlpui chuan kan la hre lo mai thei. Hmeichhe hman chi a ni a, Aizawl-ah mi thenkhat chuan an hmang tawh. Mahse, hralh a tla lem lo nia hriat a ni.

Hmeichhe hman chi condom hi MSACS (Mizoram State AIDS Control Society) te'n nawhchizuarte hman atan an lalut a, MSACS hnuaia NGO pahnih, nawhchizuarte enkawla puitu VOLCOMH leh New Life Home Society te kutah an hlanchhawng a ni.

NGO pahnihte hian an nawhchizuar enkawlte chu he'ng condom hmang tur hian an ti a, mahse, hralh a tla teh chiam lo.

"Inzirtirna te kan la ti tawk lo bawk a, tin, a man a to deuh avang hian an la uar lutuk lo niin a lang. A hmang tawhte hian an rawn la nawn lem lo," tiin VOLCOMH project manager Joseph Darrothanga chuan a sawi.

New Life Home Society project manager Samuel-a pawhin, "Kan naute hian an duh tak tak rih lo, 'awareness' lama tanlak deuh a la ngai niin ka hria," a ti ve bawk.

Hmeichhe condom hi bawm khatah 3 a awm a, a bawmin Rs 95 man, a malin Rs 35 man a ni.

Social worker pakhat chuan, "Tunah hi chuan thil thar a ni a, kan enchhin mek a ni mai a, mahse, a man a to deuh avang hian commercial sex worker-te (nawhchizuar) hian an lei ngam lo niin ka hria. A man hi tlawm deuh se, a nih loh pawhin a thlawna sem tur chu awm se tun ai hi chuan an duh ang," a ti.

"Condom hmang tur hian kan inzirtir nasa a, kan enkawl mekte pawh hian condom hmanna chang hi chu an hre tawh khawp mai a. Amaherawhchu, anmahni dawrtute hman tur a ni a, a dawrtute hian an lo hmang duh lo thin a, chu chu kan harsatna chu a ni a. Hmeichhe condom hi chu anmahni dawrtute hman tur ni lovin anmahni hman tur a ni a, chuvangin to deuh lo se chu an duh khawpin a rinawm," a ti bawk.

New Life Home Society project manager chuan, "Mipa condom hi tunah chuan a tlawm zawk a, Rs 5/15 man te a lo ni a. Tin, a thlawna hmuh theih te pawh a ni a, chuvang chuan a to zawk ai chuan a tlawm zawk an thlang rih te pawh a ni ang," tiin a sawi.

"Condom hrim hrimah hi chuan 'awareness' hi a tha tawh ang reng a, condom hman tur a awm loh pawha polythine hmang tawk te pawh sawi tur an awm ve a, chuvangin a man hi tlawm deuh se chu nawhchizuarte hian anmahni dawrtute hman tur ni lo, anmahni ngeiina an hman tur hi chu an duhin ka ring," a ti bawk.

Nikum April vel atang khan hmeichhe condom hi Mizoramah NGO te hian an kawl a, hmeichhe condom chungchangah hian zirtirna lam an la bei tak tak lo thung.
 

Thulakna: http:// zozamweeklynews.blogspot.com

Comments

No comments found.
 

Contact

Search site

 

 

 

 

                  NGAIHDAN

 

    

     Ngotekherh         Puanchei

   

        Puandum           Hmaram

 

 

 

           THU KAM HNIH KHAT


ShoutMix chat widget

 

 

                TLAWHTUTE


counter globe

 

 

  MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E